Minggu, 7 November 2021

FANGOWAI BA FOGAONI
[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]

FANGOWAI
Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu!

Jemaat : Ya'ahowu!

Liturgos : Yafao-fao khõmi Lowalangi!

Jemaat : Ya fao khõu Geheha-Nia!

FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 26 : 1-2

FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!

Jemaat : Yaduhu!

Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA!

Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato

Liturgos : Manunõ ita moroi ba Mbuku Zinunõ No.275

FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura II MOZE 20:1-17

1 Ba iwa’õ daroma li andrõ fefu Yehowa, imane:
2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami.
3 Bõi so khõmõ Lowalangi tánõ bõ’õ, baero ndra’o.
4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ.
5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu,
6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ.
7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya.
8 Ame’egõ tõdõ luo wolombase andrõ, ba we’amoni’õ ya’ia.
9 Õnõ ngaluo mohalõwõ ndra’ugõ ba õhalõ halõwõu fefu.
10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha.
11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ.
12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu.
13 Bõi ange’e.
14 Bõi ohorõ.
15 Bõi anagõ.
16 Bõi bõbõgõ khõ nawõu zi lõ duhu.
17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu.

Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1

FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!"

Jemaat : Manunõ moroi ba Mbuku Zinunõ No. 224 : 1

Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa!

Jemaat : Manunõ moroi ba Mbuku Zinunõ No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura II FETERO 3:1-7

1 Simoni Fetero zanura da’e, enoni Yesu Keriso ba sinengenia, ba zi no falukha famati omasi’õ andrõ, si mane khõma, ba wa’atulõ dõdõ andrõ, khõ Lowalangida, ba khõ Zo’aya ya’ita, Yesu Keriso.
2 Yafalukha ami wa’ebua dõdõ ba fa’ohahau dõdõ, yafahõna, ba wa’aboto ba dõdõmi Lowalangi, awõ Yesu, So’aya ya’ita!
3 Me noa sa i’amualagõ khõda, ba wa’abõlõ Lowalangi andrõ khõnia, fefu zoguna ba wangorifi ba ba wolo’õ khõ Lowalangi, balazi wa’aboto ba dõdõda zogaoni ya’ita andrõ, moroi ba lakhõmi andrõ ba moroi ba wa’asõkhi dõdõ andrõ khõnia,
4 ba ni’amualagõ khõda fondrege zebua gamabu’ula li andrõ, sebua bõli, ena’õ mõi khõmi gõi gamuata Lowalangi andrõ, ba da’õ, na no mi’efa’õ ami ba wa’atekiko andrõ, ba wangisõ andrõ, ba guli danõ.
5 Ba andrõ ya’a’oi so wa’owõlõ’õlõmi, ba wangoroma’õ buabua si sõkhi, ba wamatimi andrõ, ba ba mbuabua si sõkhi, ba fa’aboto ba dõdõ,
6 ba ba wa’aboto ba dõdõ, ba fanaha tõdõ, ba ba wanaha tõdõ, ba fa’anau gõlõ, ba ba wa’anau gõlõ, ba fangata’ufi Lowalangi,
7 ba ba wangata’ufi Lowalangi, ba fangomasi’õ talifusõ, ba ba wangomasi’õ talifusõ, ba fangomasi’õ niha fefu.

Ya’ahowu zamondrongo taroma Li Lowalangi ba same’e ba dõdõ (Luka 11:28)

Jemaat : Yaduhu!


FAMAYAGÕ IDANÕ

1. MANUNÕ
Pendeta : Manunö ita moroi ba Mbuku Zinunö No. 208 : 1
2. MANGANDRÕ
Pendeta : He Ama khöma si so ba zorugo, möiga ma’ohe ndraono andre föna-U. Tema ba fahowu’ö ia/ira tobali iraono-Mö. Fahaö ia/ira, ba wanörö lala si ndruhu andrö ba wogamö fa’auri si lö aetu, ba döi Zo’aya ya’aga Yesu Keriso. Yaduhu!

3. FAMOTOKHI BA DÕDÕ (salahi huhuo)
Pendeta : Ya’ami ira talifusö nibayagö idanö, ni’omasi’ö ba khö Zo’aya ya’ita Yesu Keriso. Ba wamayagö idanö i’a’asogö wangefa ba ngawalö horöda, I’efa’ö ba wa’amate ba Ibe’e wa’auri si lö aetu ba niha samati khö-Nia. Famayagö idanö tenga ha fanefe idanö si to’ölo, hiza’i idanö ni oroi’ö Lowalangi si ha sambua faoma taroma Li lowalangi. Lowalangi samösa zangohonogöigö famayagö idanö andre faudu ba ni’oroi’ö Yesu Keriso ba wamayagö idanö fefu soi. Taroma Li-Nia imane “Börö da’ö, mia’e mibali’ö nifahaö fefu soi, wamayagö idanö yaira,ba döi Nama,ba ba döi Nono, ba ba döi Geheha Niamoni’ö, mifahaö ira ba wolo’ö fefu hadia ia niẅa’ö-Gu khömi. Ba hiza fao khömi ndraö ero ma’ökhö irugi gamozua götö danö andre”.( Mat 28 : 19-20 ) Haniha zamati nibayagö idanö da’ö ni’orifi ba nihuku zi lö mamati ( Mareko 16 : 16 ).

Ya’aboto ba dödömi wa famayagö idanö iraono no ni’oroi’ö Lowalangi, faudu ba wamaduhu’ö zura ni’amoni’ö, börö me fangoroi’ö famayagö idanö manandrösa ba soi ma’afefu, yaia da’ö fefu niha, he satua, he sibohou ebua, he si no biha fangera-ngera ba he göi iraono. Mifondrondrongo daroma Li Lowalangi moroi ba duria somuso dödö nisura Mareko 10 : 13 – 16 :“Ba la’ohe khönia ndraono ena’ö Ibabaya, ba lategu zolohe andrö ira nifahaö-Nia. Ba me’i’ila Yesu ba mofönu ia ba imane khöra “mifa’amöi khö-Gu ndraono böi mitenawa ira ba zi manö sa mbanua Lowalangi andrö. Sindruhu niwa’ö-Gu khömi si lö manema banua Lowalangi andrö si mane iraono ba lö’ö manö lalania ba da’ö, ba Italagui ira, Ifahowu’ö, Itufa högöra tanga”. Ba ba zura Halöwö Zinenge 2 : 39 imane: “khömi sa gamabu’ula li andrö ba ba ndraonomi ba ba zi so ba zaröu fefu gofu ha wa’ato nikaoni Zo’aya Lowalangida”.

Ya’ami ira talifusö molo’ö ba zi no I’oroi’ö Yesu, tafalua wamayagö idanö andre ba döi Lowalangi Ama, Ono, ba Eheha Ni’amoniö. Si nangea mutöngöni ba wamayagö idanö andre tenga “hewisa lala wamalua ya’ia”, hiza i sabölö nisia’aigö ba wamalua, ya’ia da’ö: “ba döi Lowalangi Si Samösa Tölu”. Tebayagö idanö ba döi Lowalangi Ama faböi olifu ita götö wekolida ba gulidanö andre, wa no amada Lowalangi andrö ba ama ndraonoda göi samatörö ya’ira ba sondrorogö.

Tebayagö idanö ba döi Nono, ba wamaduhu’ö khöda wa do Yesu Keriso andrö zangehao iraonoda, he göi ya’ita satua moroi ba ngawalö horö, ba ya’ia zangosambua ya’ita ba wa’amate ba ba wemaoso-Nia, ena’ö si mane Keriso si no mususugi moroi ba ngai zi mate si manö göi ita ba wanema fa’auri.

Tebayagö idanö ba döi Geheha Ni’amoni’ö, ba wamaduhu’ö khöda wa Eheha Ni’amoni’ö zangiagö tödöda ba tödö ndraonoda göi, awö wa Ifatumbu’ö wamati, ena’ö mowa’a ira fefu ba modanedane ba wa’omasi-Nia. Yaduhu.

4. MANUNÕ
Pendeta : Manunö ita moroi ba Mbuku Zinunö No. 208 : 2
Musindro Ndraono Nibayagö Idanö

5. MANGANDRÕ
Pendeta : Mangandrö ita, "He So’aya Lowalangima umbu wa’auri ba fangorifima. Börö wa’omasi ba fa’ebua dödöU wa ma’ohe ndraonoma andre, ena’ö Ö’fahowu’ö ira. Ya’e ndraonoma nibayagö idanö ba ena’ö ba döi Lowalangi samösa tebayagö idanö ira, ba tebohouni ira ba Geheha Ni’amoni’ö, fa tobali ira okhöta-Mö ba tema’ö ira tobali banua-U. Fatumbu’ö ba dödöra wamati, fanötöna ba fa’omasi fa lö faröi ira ba khö-U he na so wanandraigö ba fangabu dödö, ba a’aro’ö wamatira ena’ö lasöndra wa’auri si lö aetu. Yaduhu!"

6. MANUNÕ
Pendeta : Manunö ita moroi ba Mbuku Zinunö No. 208 : 3
7. FANOFU
Pendeta : Ira talifusö no mirongo wa famayagö idanö no nihonogöi Yesu Keriso ba wangoroma fawu’usa Li buala fangorifi, ba Ikaoni ami Yesu Keriso ba we’amöi khö-Nia börö da’ö mitema li wanofu nitandrösaigö khömi. Ba fatua lö da’ö da ta’endrongagö lida ba wa maduhu’ö famatida ya’ita niha Keriso, (muzizio zato) ..........endronga lida:

• Ya’o mamati khö Lowalangi Ama si lö ambö fa’abölö, Somböi banua si yaẅa awö danö.
• Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate ba lako’o. No möi Ia ba mbanua niha tou, no maoso Ia moroi ba ngai zi mate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
• Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, ba fa’awösa niha ni’amoni’ö, ba fangefa horö, ba femaoso mboto zi mate, ba fa’auri si lö aetu. Yaduhu. ..... (mudadao zato)

Pendeta : Hadia edöna ami mubabayagö idanö ba döi Lowalangi ama, ono, ba eheha ni’amoni’ö? na moroi ba dödömi ba mitema ligu “Edӧnaga”
Iraono : Edӧnaga
Pendeta : Hadia faduhu dödömi wa lö sangefa’ö horö baero Yesu Keriso si no mate salahimi? Nafaduhu dödömi ba mitema ligu “faduhu dödöma”
Iraono : Faduhu dödöma
Pendeta : Hadia mifabu’u wa Lö faröi ami bawamati, ba wanötöna ba ba wamalua Faomasi ba zi sandrohu Fa’auri mi? Na moroi ba dödömi ba mitema ligu wangumaö: Mafabu’u
Iraono : Mafabu’u.

8. FAMALUA FAMAYAGÖ IDANÖ
Pendeta : Na si manö, ba da tatou’ö ba danga Lowalangi ndraonoda andre ba wamayagö idanö, (ihalö nidanö Fandrita itötöi döi nono/ndraono) : ya’ugö onoma sotöi ......... ubayagö idanö ndra’ugö ba döi Lowalangi Ama,.......(ihalö nidanö zui) ba ba döi nono-Nia Yesu Keriso, ...... (ihalö nidanö zui) ba ba döi Geheha Ni’amoni’ö. Yaduhu!
Howuhowu (itufa högö nono Fandrita) imane : Ba lö fangorifi ba danö bö’ö ba lö’ö göi töi bö’ö nibe’e ba niha ba gulidanö ba wangorifi ya’ugö, baero döi Yesu andrö. Yaduhu!

9. MANGANDRÖ : (muzizio ndraono nibayagӧ Idanӧ)
Pendeta : He Yehowa Lowalangi Ama khöma ba khö Zo’aya ya’aga Yesu Keriso,! Masuno Ndra’ugö moroi si’aikö ba dödöma ba ma’andrö saohagölö-U gamabu’ula li-Mö andrö , ohahau sa’ae dödöma me no ba danga-U so. Ma’andrö khö-U ebua dödö-U khöra fa böi aefa ba dödöra daroma li-Mö, abölö’ö ira ba wolo’ö khö-U, timba ngawalö wamaelungu awö dandraŵa, ba na elungu ira ena’ö ba böi böhöli ira, fazugizugi ba dödönia/dödöra, wa lö sameta horö baero-Mö. ena’ö lala wa’aurinia/ra faudu ba zomasi Ndra’ugö afu oi orudu ndra’aga ba da’ö ba gamozua, ba wanuno Ya’ugö. Yaduhu!

10. MANUNÕ
Pendeta : Manunö ita moroi ba Mbuku Zinunö No. 209



FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261

2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.

Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana]

Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163

[Pengkhotbah Mõi ba Mimbar]

HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.

  1. Fombaso Taroma Li Lowalangi moroi ba zura SINUNÕ 146:1-10

    2. 1 Haleluya, suno Yehowa, ya’ugõ tõdõgu!
    2 Da’usuno Yehowa, gõtõ wa’anau nosogu: ba manunõdo khõ Lowalangi, gõtõ wa’ara ndra’odo ba guli danõ.
    3 Bõi midõnadõna ba zalawa, ono niha, si lõ fangorifi.
    4 Na aetu nosonia, ba ifuli tobali tanõ; na luo da’õ, ba awai nikhoi dõdõnia.
    5 Ya ahowu ba zi no mõi sangorifi Lowalangi Yakobo andrõ, sanõtõna khõ Lowalanginia Yehowa,
    6 samazõkhi banua, awõ danõ, ba asi, awõ nõsinia andrõ fefu; si lõ farõi ia, irugi zi lõ aetu.
    7 Solohe ba lala huhuo nifalangõgõ andrõ, same’e gõ ba zolofo; i’efa’õ nikuru andrõ Yehowa.
    8 Yehowa zamokai hõrõ zau’a andrõ; Yehowa zamaõga si no aõndrõ; i’omasi’õ zatulõ tõdõ Yehowa.
    9 Irorogõ zi fatewu andrõ Yehowa; itolo zi lõ ama, si lõ ina, awõ lakha mbanua andrõ; ba sebua horõ andrõ, ba i’ohe ba lala elungua.
    10 Razo Yehowa, irugi zi lõ aetu, Lowalangiu andrõ, ya’ugõ Siona, gõtõgõtõ wa’ara. Haleluya!

  2. Famotokhi Taromali Lowalangi

  3. Sinanõ ba dõdõ tehalõ moroi ba zura SINUNÕ 146:6

    4. Samazõkhi banua, awõ danõ, ba asi, awõ nõsinia andrõ fefu; si lõ farõi ia, irugi zi lõ aetu.

  4. Fangandrõ Fondruhõ Wamotokhi Taromali

Jemaat : Manunõ moroi ba Mbuku Zinunõ No. 154

TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:

  • Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.

  • Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.

  • Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
 Liturgos : Mudadao Zato.

PENEGUHAN SIDI
Pendeta: Manunõ Moroi ba Mbuku Zinunõ 174:1-2

Fangahono Dõdõ
Fangorifida, ha ba döi Lowalangi si no momböi banua si yaŵa awö danö. Yaduhu!

Fangandrõ
He Yehowa Lowalangima, ba khö Zo’aya ya’aga Yesu Keriso, si no mogaoni ba si no mombali’ö ya’aga tana khö-U, tobali ndrotondroto mbanua Zorugo andrö. No sowuawua tödö ndra’aga, me ma’ökhö andre möi tanö föna-Mö ndraono mbanua-U ba wamaduhu’ö famatira khö-U, ba zanehe mbanua-U. Ma’andrö khö-U, hakhösi dödö-U ba fahowu’ö ndraono andre, nitou’öma ba danga-U. Hagaini dödöra, Eheha-U Ni’amoni’ö, fa böi la’aohasi wawu’usa lira khö-U, ba ena’ö lö faröi ira ba wamati irugi zi lö aetu. Yaduhu!

Oroisa ba Wanga’aro’õ
Ya’ami ira talifusö ni’omasi’ö ba khö Yesu Keriso.
Modanedane ba Tata Gereja BNKP, faza 17, ayati 3b tefaduhu’ö wa: “Tefalua wamayagö idanö iraono ba wongambatö niha Keriso, ba hiza monoro dödö zatua ba wamahaö iraono andrö ba lala wamati, irege lafaduhu’ö wamatira khö Lowalangi ba ginötö wanga’aro’ö. Andrö ba zi ma’ökhö andre, möi ami sumindro föna Lowalangi, ba zanehe mbanua niha Keriso ba wawu’usa li, wamaduhu’ö famatimi khö Lowalangi. Irege tobali sa’ae ami safönu ndrotondroto mbanua niha Keriso ba BNKP. No göi noro dödö fefu mbanua niha Keriso ba wamalua halöŵö: “famaduhu’ö Turia Somuso dödö ba niwöwöi fefu; si fao fanga’aro’ö ba fahasambua, awö wamalua halöŵö fangomasi’ö, ma diakonia. Andrö tekaoni ita fefu ba wanudreheni halöŵö andre, faudu ba mbuala fa’ebua dödö zi falukha zamösana.
Famalua fanga’aro, no göi sambua famaduhu’ö wa no maulu ami tobali ndrotondroto mbanua niha Keriso. Ba fao göi ami ba watomesa ni’amoni’ö, ba monoro dödö ba wangai halöŵö ba gotalua mbanua niha Keriso, awö ngawalö zo amakhaita ba wa’atobali ndrotondroto mbanua niha Keriso, si no muhonogöi ba gamakhoita ba BNKP.
Andrö fatua lö ötema (mitema) mbuala fa’ebua dödö awö howuhowu Lowalangi ba wanga’aro’ö, ba mifaduhu’ö soroi sibai ba dödö wamatimi khö Lowalangi.
(Muzizio ba nahia ni’a’aro’ö, ba lafaduhu’ö Duho Wamati Niha Keriso:
• Ya’o mamati khö Lowalangi Ama si lö ambö fa’abölö, somböi banua si yaẅa awö danö.
• Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
• Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zi mate, ba fa’auri si lö aetu. Yaduhu.

Fawu’usa li
Ya’ami iraono ni’a’aro’ö! No mi’endrongagölimi wamaduhu’ö famatimi khö Lowalangi ba zanehe mbanua niha Keriso, ba so nasa nisofugu khömi. Ba hewa’ae ya’o zihede khömi, ba hulö Lowalangi sa zanofu khömi ba wanofugu andre. Andrö khö-Nia mifabu’u limi, na mitema ligu andre:

1. Hadia, faduhu dödömi khö Lowalangi Ama, si lö ambö fa’abölö, somböi banua si yaŵa awö danö, ba ba khö Zo’aya ya’ita Yesu Keriso, ono Lowalangi Siha samösa, So’aya ba Sangorifi ya’ita; ba ba khö Geheha Ni’amoni’ö, sanolo, sondrara tödö ba samohouni fa’aurimi? Na faduhu dödömi, ba mitema ligu: “Nofadudu Dödöma”.

2. Hadia mifabu’u wa lö mitörö lala elungua saekhu ba wa’atekiko, ba hadia mi’ogorofi sa’ae zi lö atulö, ba lö faröi ami ba wolo’ö ba ba wamalua si faudu ba daroma Li Lowalangi? Na si manö, ba mitema ligu: “Mafabu’u soroi ba dödöma”.

3. Hadia milulu wa’aurimi nifatörö Zo’aya ya’ita Yesu Keriso, ba hadia lö faröi ami khö-Nia ba zi sandrohu fa’aurimi, he ba wa’omuso dödö, he göi na so wamakao ba ma fa’amate? Na si manö, ba mitema ligu: “Lö faröi ndra’aga, ya Itologa Lowalangi”.

Fanga’aro’ö ba Famahowu’ö
Modanedane ba wamayagö idanö awö wamaduhu’ömi famatimi khö Lowalangi, andrö Ya’o, enoni Yesu Keriso: “U’a’aro’ö ami tobali ndrotondroto mboto ba soroi yomo Lowalangi, ba döi Lowalangi Ama, ba döi Yesu Keriso, ba ba döi Geheha Ni’amoni’ö.” Yaduhu!

(Möi föna, latuhi danö iraono ni’a’aro’ö, ba latufa tanga högö ndraono ni’a’aro’ö):
• Yamufahowu’ö ami Lowalangi, si no mogaoni ya’ami.
• Yamufahowu’ö ami Yesu Keriso, si no mangöhöli ya’ami.
• Yamufahowu’ö ami Eheha Ni’amoni’ö, sangehao tödömi. Yaduhu!

(Aefa da’ö ba ifazawa danga yawara fefu ba imane fandrita samahowu’ö:)
"Lowalangi andrö, samatörö ya’ita, ba yamu’a’aro’ö dödömi khö-Nia, fa böi faröi ami, ba fa lö awuwu furi ami, irege mikhamö dania wa’auri andrö si lö aetu. Yaduhu!"

Manunõ Moroi ba Mbuku Zinunõ 175:1+3

Menemene
Ba zi no mu’a’aro’ö:
Me no te’a’aro’ö ami, ba no moahonoa tobali ndrotondroto mbanua niha Keriso, andrö mitöngöni ba mi’o’aurifagö daroma Li andre:

• Ba zura Nefeso 2:19-22, imane: “Ba tobali tenga sa’ae niha bö’ö ami, ba tenga sa’ae si fatewu, no banua ni’amoni’ö ami, ba soroiyomo Lowalangi, nifa’anö ba dete danedane andrö, sinenge andrö ba sama’ele’ö, ba zi no tobali danedane ba watalinga Keriso Yesu, ba zanöi tomosa andrö, ma’asambua, nifa’anö, tobali osali ni’amoni’ö, ba khö Zo’aya, ba nifa’anö göi ya’ami, awö, omo Lowalangi, ba Geheha.”

• Ba ba zura 1 Petero 1:15-19, imane: “Tuladami ni’amoni’ö andrö, si no mogaoni ya’ami, si manö göi mi’amoni’ö ami, ba mbuabuami andrö, fefu, me no so ba zura: ”Mi’amoni’ö ami, me no ni’amoni’ö Ndra’odo.” Ba na fa’ama ami khö zi lö mamaigi bawa niha, wanguhuku, same’e balazi buabua zamösana, ba mi’ata ufi zi lö göna buabuami, götö wekolimi andrö; me no mi’ila, tenga hadia ia zi tekiko, firö, ba ma ana’a hölimi ba huku faya, andrö, khö ndra tua, no do sebua böli hölimi, hulö ndro nono mbiribiri si lö sinegu, si lö si ta’unö, do Keriso andrö.

Ba Mbanua Niha Keriso:
Ya’ami banua niha Keriso, mitema’ö ndra talifusö andre si no tobali ndrotondroto mbanua ba si sara lala wamati ita ba khö Yesu Keriso. Andrö mitöngöni daroma Li Lowalangi, me’imane: “ba mifo’ahonoa wa’omuso dödögu andrö, ena’ö ha sara dödömi, ena’ö faoma wa’omasimi nawömi, ena’ö ha sambua dödö ba ha sambua gera’era. Böi mifonaha wasosota, ba he fayawasa; mi’ide’ide’ö ami, ba yaebua ba dödö zamösana nawönia, moroi khönia. Böi ha soguna khönia ibe’e ba dödönia zamösana, soguna khö nawönia göi yamube’e ba dödönia.

Mangandrö
Mangandrö ita:
He Yehowa Lowalangi, si no umbu wa’auri ba si no mangorifi ya’aga. Ba wa owuawua dödö ma’ondrasi Ndra’ugö ba wangandrö saohagölö me no Öfondrondrongo wawu’usa li ndraono andre, ba no Öfahowu’ö ira moroi ba wa’omasi-Mö. Ma’andrö khö-U, tema’ö ira tobali ono mbanua-U. He Lowalangima, ma’andrö khö-U, böi röi ba fahowu’ö ira ba lala wekolira. Fazugizugi ba dödöra zi no lafaduhu’ö mege föna-U, ba föna niha göi, fa böi olifulifu ira daroma Li sindruhu andrö. Dou’ö na khöra wamati, nönö na khöra wanötöna ba fa’omasi, fa böi la’osilö’ögö Ndra’ugö, götö wekolira ba gulidanö andre. Yaduhu!

Manunõ Moroi ba Mbuku Zinunõ 174:4


FEMANGA GÕ NI'AMONI'Õ

1. MANUNÕ
Pendeta : Manunö ita moroi ba Mbuku Zinunö No. 281 : 1-2
2. FOGAONI
Pendeta : "Ya’o Gö fangorifi," Iwa’ö Yesu, "Si möi khö-Gu, ba döhö wa’olofo, ba si faduhu tödö khö-Gu, ba lö sa’ae owökhi dödö." (Yohane 6:35).

3. FAMA'ANÕ
Muzizio zato
Pendeta : He ya’ami ira talifusö, da ta’owuawua’ö dödöda watomesa khö Lowalangi, ba wanema buala fa’ebua dödö-Nia, ba khö Zo’aya ya’ita Yesu Keriso, si no mate ba horöda, ba si no ifuli maoso wangalani fa’amate, irege falukha ita wangorifi ba fa’ohahau dödö. Andrö da tasekhegö dödö we’amöi föna Zo’aya.

Hadia edöna ami mi’ombakha’ö horömi khö Lowalangi, sangila era’era dödö niha? Hadia, lö mibini’ö, wa no misawö goroisa-Nia fefu? Hadia abu dödömi ba da’ö ba mi’ogorofi sa’ae wolau horö? Na si manö, ba mitema ligu: “tebai mabini’ö horöma”.

Jemaat : Tebai mabini’ö horöma.

Pendeta : Hadia faduhu göi dödömi lö sameta horö baero Yesu Keriso, si no manaögö huku salahimi ? Na faduhu dödömi, ba mitema ligu wanguma’ö: “Faduhu dödöma”

Jemaat : Faduhu dödöma.

Pendeta : Hadia, edöna ami mibeta ba dödömi wayaẅasa, awö watiusa, awö wa’afökhö dödö? Hadia edöna ami mi’efa’ö zala zi so sala khömi? Hadai edöna ami mi’ogorofi mbuabua niha si sagötö tanö andrö, ba wamöhöi ya’ia? Ba mitema ligu: “edönaga ya itologa Lowalangi.”

Jemaat : Edönaga ya itologa Lowalangi.

Pendeta : Mangandrö ita ba wangandrö fa’ahakhö dödö Lowalangi. "He Lowalangi ! Niha si so horö ndra’aga, ma’ombakha’ö horöma khö-U : oya nilauma si lö sökhi, salama khö-U ba tenga göi zide’ide. Oya göi ngawalö zi lö sökhi ba dödöma bakha: Fayaŵasa, fa’afökhö dödö, ba fatiusa; no ambö famati, ba no oya na danö bö’ö, si lö atulö nifaluama tanöföna-U. He Yehowa, hakhösi dödö-U ndra’aga ba wa’omasi-Mö andrö ! Efa’ö khöma horöma andrö ba wa’ebua dödö-U andrö ! Sasai ndra’aga ba horöma andrö börö nono-U Yesu Keriso si no mangöhöli ya’aga. Yaduhu!"

Tebe’e ginötö ba wangandrö ba dödö zamösana (1-2 menit)

Pendeta : Me no mi’ombakha’ö horömi ba wogamö fangefa, ba na sindruhundruhu mangesa dödömi ba horömi ba wanötöna fangorifi khö Yesu Keriso, ba tola ufaduhu’ö khömi: wa I’efa’ö horömi andrö fefu Lowalangi, börö wamakao andrö nitaögö Yesu So’aya ya’ita! Mudadao Zato!

4. MANUNÕ
Pendeta : Manunö ita moroi ba Mbuku Zinunö No: 182 : 1
5. OROISA YESU SANANDRÕSA BA WEMANGA GÕ NI'AMONI'Õ
Pendeta : Ya’ami banua niha keriso ni’omasi’ö. Mifondrondrongo daroma li Lowalangi, sanandrösa ba Wemanga Gö Ni’amoni’ö, “So’aya ya’ita Yesu me bongi andrö, me te’a mböli-Nia, me orudu manga Ia khö ndra nifahaö-Nia, ba Ihalö roti (mufazawa roti), I’aohasi gölö Lowalangi, ba Iboboto roti andrö, Ibe’e khö ndra nifahaö-Nia, ba Imane : “Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o”. Si manö göi Ihalö mako (mufazawa naha nagu), me no aefa manga ira, I’aohasi gölö Lowalangi, ibe’e khöra, ba Imane : “Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o”.
Ba li-Nia andre Ifaduhu’ö sibai khöda Yesu wanguma’ö. Ero na mi’a roti andre (mufazawa roti), ero na mibadu nösi mako andre (mufazawa mako), ba Uforoma’ö sibai khömi wa’omasi-Gu ami, awö wa’ahakhö dödö-Gu; niha si tekiko ena’ö ami, na lö Ubelegö mena’ö wa’auri-Gu fönami, fa böi sa’ae Itörö tödö Lowalangi horömi, ba wanguhuku ya’ami. Me no matedo, me no aduwa ndro-Gu iwa’ö Yesu ba aheta sa’ae horö na mifalu’i’ö khö-Gu.
Börö wa’amate ba femaoso Zo’aya ya’ita Yesu Keriso wa tasöndra wangefa horö awö wangorifi. Andrö dozi sanema ha sambua boto, ha sambua wamati, fa’omasi ba fanötöna, Ya faofao khömi Geheha Ni’amoni’ö.
Jemaat : Manunö Moroi ba Mbuku Zinunö No. 182 : 2
6. FAMA'EMA BA FANEMA'Õ GÕ NI'AMONI'Õ
Pendeta : Imane Yesu, "Mi’aine khö-Gu dozi serege tödö, Ufolombase ami."

---- FAMA'EMA ROTI AWÕ AGU ----

Sato manunö moroi ba Mbuku Zinunö No. 237
[Muzizio Zato]
Pendeta :
1) Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o!
2) Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o!
Ena’ö Boto ba Do Zo’aya ya’ita Yesu Keriso, ni’amoni’ö ba solakhömi andrö, da’ö zangabölö’ö ba sondrorogö ya’ami irugi zi lö aetu. Mi’angawuli si fao fa’ohahau dödö. Ya mufahowu’ö ami Lowalangi, Yaduhu!

[Mudadao Zato ba teowuloi galasi ba ame'ela Wemanga Gõ Ni'amoni'õ / Mangawuli ba nahia zamösana, ba latörö wama’ema fasömbata ba nahia si no mufa’anö]

Pendeta : Manunö ita moroi ba Mbuku Zinunö No: 232 : 1 - 6

FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"

Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.

Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:

  • Ya mufahowu’õ ami Lowalangi, Ya murorogõ ami;
  • Ya mufohaga mbawa-Nia khõmi, Ya mu’ebua’õ dõdõ-Nia khõmi;
  • Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!

Jemaat : Manunõ moroi ba Mbuku Zinunõ No. 248

Pengkhotbah : Ya'ahowu!!!

Jemaat : Ya'ahowu!!!

****** IBADAH SELESAI ******

Ama Thania Waoma