Agendre Fanema Eheha (Pentakosta)



Minggu, 30 Mei 2021

FANGOWAI BA FOGAONI
[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]

FANGOWAI
Liturgos : Ya’ami banua Zo’aya. No oi owulo ita oi faondra ba wa’owuawua dödö, ba wanörö tödö Fanema Eheha Ni’amoni’ö. Ma owai ami ba döi Yesu Keriso, Ya’ahowu!

Jemaat : Ya'ahowu!

Liturgos : Ba wa’owuawua dödö andrö, da talau fara’u tanga khö nawöda si so ba gambölö ba ma ba gaberada zamösana ba tamane: "Ya’ahowu wanema Eheha Ni’amoni’ö!"

Jemaat : Ya’ahowu wanema Eheha Ni’amoni’õ.

Liturgos : Yafao-fao khõmi Lowalangi!

Jemaat : Ya fao khõu Geheha-Nia!

FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 28 : 1-2

FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!

Jemaat : Yaduhu!

Liturgos : Ba Ube’e khõmi dõdõ si bohou ba Eheha si bohou Ube’e ba dõdõmi bakha; tõdõ kara andrõ, ba Uheta barõ dotomi ba Ube’e khõmi dõdõ nagole. Ba Eheha-Gu Ube’e ba dõdõmi ba mi’o’õ nifakhoi-Gu Ube’e, ba mitõngõni lala nibe’e-Gu ba mitõrõ. (Hezekieli 36:26-27) HALELUYA!

Jemaat : Manunõ

Liturgos : Mangandrõ ita, "He Yehowa Lowalangima! Nisuno döi-Mö götögötö wa’ara, me no sebua tödö Ndra’ugö. No Öfatenge Geheha-U Ni’amoni’ö, ba wamohouni, ba wondrorogö, ba ba wanga’aro’ö ya’aga tobali ono sanema ondröita sebua böli, ya’ia wangorifi andrö ba khö Zo’aya ya’aga Yesu Keriso. No Öfatenge khöma, Geheha Ni’amoni’ö ba wamahaö ba ba wohagaini ya’aga banua-U. Mangalulu ndra’aga khö-U si fao fangidengide’ö ba wanema’ö Eheha-Mö, ena’ö I’iagö dödöma. Aine khõma Eheha Ni’amoni’õ ba wangabölö’ö ya’aga ba wolo’ö somasi Zo’aya ya’aga Yesu Keriso, Yaduhu!"Mudadao Zato

Liturgos : Manunõ ita moroi ba Mbuku Zinunõ No. 276 : 1

FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura YESAYA 6:1-8

1 Ba ndrõfi wa’amate Usia andrõ, razo, ba u’ila Zo’aya, sidadao ba dadaoma sebua, si no alawa: anõnõ gosali ahe mbarunia.
2 Serafi fõnania, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo.
3 Ba faoma lamanemane we’ao khõ nawõra: Ni’amoni’õ, ni’amoni’õ, ni’amoni’õ Yehowa ngahõnõ andrõ; no anõnõ lakhõminia guli danõ ma’asagõrõ!
4 Ba mudõgõ latalata zilõtõ ba wa’ebua lira, ba we’ao andrõ, ba afõnu nomo simbo.
5 Ba umane: Alai ndra’o! tekiko ndra’o; me no niha si ra’ira’iõ bewe ndra’odo ba me ba niha si ra’ira’iõ bewe sodo; noa sa i’ila hõrõgu razo andrõ, Yehowa ngahõnõ!
6 Ba humombo zamõsa Zerafi andrõ, i’ondrasido, so ba dangania nono gara, ni’oyoni ba galitõ, niforõnia ba naha wame’e sumange.
7 Ba ifatõfa ba mbawagu ba imane; Me no fatõfa ba bawau da’e, ba no aheta golalõwamõ ba no mubu’a horõu.
8 Ba urongo li Zo’aya, imane: Ha niha nifatengegu, ha niha zi mõi khõda? Ba umane: Ya’e ndra’o, fatenge ndra’o.

Si manõ daroma Li Lowalangi, da tatema’õ faoma sinunõ moroi ba Mbuku Zinunõ NO. 120 : 1

FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Yehowa Lowalangima si no fahöna fa’omasi ba niwöwöi-Mö fefu. Ma’ondrasi Ndra’ugö ma’ökhö andre, ba wangombakha khö-U, wa tenga sinangea ndra’aga wanema howuhowu, me no fahöna horöma; me lö khöma fanörö lala satulö föna-U, me ma’o’ö nikhoi dödöma sito’ölö andrö. Ba me no oroma khöma Geheha Ni’amoni’ö, sohagaini lalama, ba solohe ya’aga ba zi duhu, andrö ma’andrö khö-U: heta ba dödöma fefu zira’ira’iö andrö, ba be’e aefa khöma horöma, ena’ö tola monaha ba dödöma, Zanolo, nifabu’u-Mö andrö, si no möi ba wanolo ya’aga ba wolaẅa afökha, sanandraigö ya’aga ero ma’ökhö; afu tola Ötandrösaigö khöma göi ngawalö howuhowu somasi‘Ö, ba ena’ö sangila Lowalangi ndra’aga ba gamozua, ba zorugo yawa."

Mangandrõ ba dõdõ zamõsana fõna Lowalangi.....1 irugi 2 meniti.

Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu!

Jemaat : Manunõ moroi ba Mbuku Zinunõ No. 224 : 1

Liturgos : Fa’ahakhõ dõdõ sa, wa no auri ami, moroi ba wamati, ba tenga moroi khõmi da’õ, no buala Lowalangi. (Efeso 2:8) "Eheha andrö ba no we’ewe’e dödöda, ba gondröita andrö fefu, ya’ia wangöhöli andrö ba fangorifi ba wanuno lakhömi-Nia andrö". (Efeso 1:14) Lakhõmi khõ Lowalangi si yawa!

Jemaat : Manunõ moroi ba Mbuku Zinunõ No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura HEBERAIO 2:1-4

1 Andrõ mendrua manõ ta’olembai ena’õ nirongoda andrõ, fa bõi ahani ita.
2 Na no aro sa’ae daroma li andrõ, ni’ombakha’õ mala’ika, ba na no tesulõni si nangea khõnia fefu ngawalõ wanawõ, awõ ngawalõ wa lõ molo’õ fefu,
3 ba he tawisa wangefa’õ ya’ita, na ta’ositengagõ wangorifi si manõ fa’ebua? nifobõrõ ba wangombakha Zo’aya andrõ, nifaduhu’õ zamondrongo khõnia andrõ, khõda,
4 nifo’awõ famaduhu’õ andrõ khõ Lowalangi, ba dandra andrõ, ba ba gila’ila, ba ba ngawalõ hadia ia wa’abõlõ, ba ba wame’eme’e Eheha ni’amoni’õ andrõ, dali zomasi ia.

Ya’ahowu zamondrongo taroma Li Lowalangi ba same’e ba dõdõ (Luka 11:28)

Jemaat : Yaduhu!

FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261

2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.

Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana

Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163

[Pengkhotbah Mõi ba Mimbar]
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
  1. Fombaso Taroma Li Lowalangi moroi ba zura YOHANE 3:31-36

    2. 31 No fõna dánõ bõ’õ fefu zi otarai si yawa. Moroi ba guli danõ, zi otarai guli danõ, ba moroi ba guli danõ hedehedenia. Ba si otarai zorugo,
    32 ba ni’ila hõrõnia, awõ nirongonia, ifaduhu’õ, ba lõ samati famaduhu’õnia.
    33 Samati famaduhu’õnia, ba i’a’aro’õ, wa no si ndruhu Lowalangi.
    34 Li Lowalangi wedehe nifatenge Lowalangi, me no tenga nisu’a Geheha, nibe’e Lowalangi.
    35 I’omasi’õ Nono Ama, ba no ahori ibe’e ba dangania fefu hadia ia.
    36 Khõ zamati khõ Nono andrõ so wa’auri si lõ aetu; lõ i’ila dania wa’auri si lõ mamati khõ Nono andrõ, lõ tebulõ wõnu Lowalangi khõnia.

  2. Famotokhi Taromali Lowalangi
  3. Sinanõ ba dõdõ tehalõ moroi ba zura YOHANE 3:36a

    4. Khõ zamati khõ Nono andrõ so wa’auri si lõ aetu.

  4. Fangandrõ Fondruhõ Wamotokhi Taromali

Jemaat : Manunõ moroi ba Mbuku Zinunõ No. 154

TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
  • Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
  • Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
  • Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Mudadao Zato.
Jemaat : Manunõ moroi ba Mbuku Zinunõ No. 188 : 1

FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.

Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
  • Ya mufahowu’õ ami Lowalangi, Ya murorogõ ami;
  • Ya mufohaga mbawa-Nia khõmi, Ya mu’ebua’õ dõdõ-Nia khõmi;
  • Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!

 Jemaat : Manunõ moroi ba Mbuku Zinunõ No. 503:1

Pengkhotbah : Ya'ahowu!!!

Jemaat : Ya'ahowu!!!

****** IBADAH SELESAI ******