Agendre Fa'amate Yesu
Jumat, 2 April 2021
FANGOWAI BA FOGAONI
[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI
Liturgos : Ya’ami banua niha Keriso. Fa’owuloda ma’ökhö ba wamalua Fanörö tödö “Fa’amate Zo’aya ya’ita Yesu Keriso” ba wangöhöli ya’ita ba horöda. Ma’owai ami ba döi Zo’aya. Ya’ahowu ami fefu, ya faofao khõmi Lowalangi!
Jemaat : Ya'ahowu! Ya fao khõu Geheha-Nia!
FOGAONI
Liturgos : Da tasuno Lowalangi Amada, si no manehegö Ono-Nia omasiö, mate ba röfa salahida, da möi ita ba wamalua fasumangeta khö Lowalangida. Tasuno Ia, manunö ita moroi ba Mbuku Zinunõ No. 90 : 1-2
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Me lahedehede’õ Ia, ba lõ Ifuli Ihedehede’õ; me lafakao Ia, ba lõ Ifangaha wolau balõ, Ibe’e ba danga zangatulõ’õ fanguhuku andrõ, Yaduhu! (1 Fetero 2:23) YADUHU!
Jemaat : Manunõ
Liturgos : Manunõ ita moroi ba Mbuku Zinunõ No. 96 : 1
Liturgos : Da tafondrondrongo daroma Li Lowalangi, tehalõ moroi ba zura SINUNÕ 22:2-12
2 He Lowalangigu! He Lowalangigu! Hana wa no õ’erogõ ndra’o? No arõu ndra’ugõ, ba wangorifi ya’o ena’õ ba ba wamondrongo ligu, fangarõngarõgu andre.
3 He Lowalangigu! Mu’ao ndra’o, na ma’õkhõ, ba lõ õtema ligu, ba ba zi bongi, ba lõ falukha wondrara dõdõ.
4 Ba ni’amoni’õ sa atõ ndra’ugõ, sidadao yawa wanunõ Ndraono Gizeraëli andrõ.
5 Khõu manõtõna ndra tuama fõna, ladõnadõna, ba no õ’orifi ira.
6 Ya’ugõ la’angarõfi li, ba lasõndra wangorifi; khõu ladõnadõna, ba lõ si te’ailaisi ira.
7 Ba ya’odo, ba no kukuõ ba tenga niha; fama’iki niha ndra’odo ba si lõ ba dõdõ zato!
8 La’o’aya ndra’o dozi sangila ya’odo, labobo mbawara ba lafalikhõ ira.
9 ”Be’e balazi Yehowa! Yamu’orifi ia, yamu’efa’õ; i’omasi’õ sa atõ ia.”
10 Ya’ia, ya’ugõ zanõbi ya’odo mege moroi ba dalu ninagu, ba lõ sabu dõdõgu, ba mbalõ meme ninagu, õbe’e.
11 Ya’ugõ dõtõnafõgu, i’otarai dalu ninagu; i’otarai ba gaheta ninagu, ba Lowalangigu ndra’ugõ.
12 Bõi arõu’õgõ khõgu, me no ahatõ wa’atosasa, lõ’õ sa sangorifi.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ NO. 103 : 1
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Lowalangi, sangila era’era dõdõ niha, awö nilaura fefu! No aboto ba dödöma, wa börö horöma soya sibai, si no to’ele khö-U ba zorugo, wa no Öhare’ö khö Nono-U omasiö ngawalö lualua horö si göna khöma ena’ö, ya’ia wamakao soya, ba fango’aya, awö wangailasi, ba fa’amate ba röfa si no fondrege wa’afökhö. Ma’andrö khö-U, a’asogö ba dödöma wamati saro, ena’ö manandrösa khöma, zi no Itaögö Yesu Keriso, fa tola te’orifi ndra’aga, aefa ba wönu-Mö ba luo safuria. Bologö dödö-U khöma ba be’e aefa khöma horöma..."
Mangandrõ ba dõdõ zamõsana fõna Lowalangi.....1 irugi 2 meniti.
Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu!
Jemaat : Manunõ moroi ba Mbuku Zinunõ No. 224 : 1
Jemaat : Manunõ moroi ba Mbuku Zinunõ No. 450
FOMBASO WAÕWAÕ WAMAKAO YESU
Liturgos : Manunõ ita moroi ba Mbuku Zinunõ No. 98:1
Fombaso Mataio 26:36-46
36 Ba irugi Yesu halama, Gezemane dõinia, fao ira khõnia. Ba imane khõ ndra nifahaõ: Midadao ba da’e, fatua mõido ba da’õ, ba wangandrõ.
37 Ba i’ohe awõnia Wetero, ba ono Zebedaio andrõ, si darua, ba ibõrõtaigõ abu dõdõ ba alangu dõdõ.
38 Ba imane khõra: Abu sibai dõdõgu, irugi wa’amate; mi’iagõ da’e, bõi mifõrõ, awõgu.
39 Ba mõi ia, lõ arõu, ifalõgu ia tou, mangandrõ ia, imane: He Ama, na so lala, ba yamutalu’i ndra’o mako andrõ. Ba bõi somasi ndra’o, ha somasi ndra’ugõ.
40 Ba mõi ia khõ ndra nifahaõ andrõ, ba no mõrõ ira, me irugi, ba imane khõ Wetero: Ba tebai si lõ mõrõ ami mato saza, awõgu?
41 Bõi mifõrõ, ba miangandrõ, fa lõ itõrõ ami fanandraigõ. Aoha sa gõlõ dõdõ, ba no sambõ fa’abõlõ nõsi.
42 Ba ifuli mõi, zamuza tõ, mangandrõ ia, imane: He Amagu! na te’ai italu’i ndra’o, fa lõ ubadu ia, ba ya’itõrõ zomasi ndra’ugõ.
43 Ba me ifuli ia ba noa zui mõrõ ira, me irugi, noa sa abua guli hõrõra.
44 Ba irõi ira, ifuli mõi mangandrõ, no medõlu, si manõmanõ linia.
45 Aefa da’õ, ba mõi ia khõ ndra nifahaõ andrõ, ba imane khõra: Ba mifõrõ sa’ae, ba mi’olombase! — Hiza, no fadege, fa tebe’e ba danga niha si so horõ Nono Niha.
46 Mifaoso, talabu, hiza no ahatõ zi manga mbõligu andrõ.
Liturgos : Manunõ ita moroi ba Mbuku Zinunõ No. 98:2
Fombaso Mataio 26:57-67
57 Ba la’ohe Yesu sondra’u ya’ia andrõ, la’ohe khõ gere sebua andrõ, Kayafa, ba zi falukha zangila amakhoita ba satua mbanua andrõ.
58 Ba i’o’õ Fetero, arõu moroi furi, irugi golayama gere sebua andrõ, ba mõi ia bakha, dumadao ia ba ngai genoni, ba wamaigi lualua.
59 Ba la’alui ere sebua ba salawa rafe sebua andrõ fefu, he lawisa wamõbõgõ horõ khõ Yesu, ba wamunu ya’ia,
60 ba lõ lasõndra, he wa’ae ato zi so samõbõgõ, sofaya. Ba ba gafuriata, ba darua zi so,
61 lamane: No iwa’õ da’õ: U’ila ududugõ gosali Lowalangi andrõ, ba ha tõlu ngaluo u’angotomosi’õ.
62 Ba maoso gere sebua, imane khõnia: Hadia, lõ õtema li ba nibõbõgõ da’e khõu?
63 Ba lõ hedehede Yesu. Ba humede gere sebua, imane khõnia: Ube’e ba hõlu ndra’ugõ, khõ Lowalangi sauri andrõ, ena’õ õwa’õ khõma, na Keriso andrõ ndra’ugõ, Ono Lowalangi.
64 Imane khõnia Yesu: Ya’ia niwa õu. Ono Lowalangi ndra’odo. Ba uwa’õ khõmi, i’otarai da’e, ba mi’ila, dumadao Nono Niha ba gambõlõ wa’abõlo andrõ, ba mi’ila so ia moroi sa, ba dete lawuo, ba mbanua si yawa.
65 Awena isika nukhania ere sebua, imane: No mangaohangaoha ia! Hadia guna zi so ba mbõrõ sa’ae khõda? hiza, faefá mirongo wangaohangaoha andrõ.
66 He wisa ba dõdõmi? Ba latema linia, lamane: Huku tamunu hukunia.
67 Ba ladidiloi mbawania, lagukhui ia, ba so gõi zamalisi bawania.
Liturgos : Manunõ ita moroi ba Mbuku Zinunõ No. 98:3
Fombaso Mataio 27:31-50
31 V. Ba me no aefa la’o’aya ia, ba laheta khõnia mbaru luo andrõ, ba lafonukha ia nukhania, ba la’ohe ia misa, ba wamorõfa ya’ia.
32 Ba me mõi ira baero, ba falukha ira niha, banua Girene, Simoni dõinia, ba lara’u da’õ, ba wolohe rõfania.
33 Ba me larugi naha andrõ, sotõi Gologota —
34 sokamu’u geluaha — ba lafabadugõ khõnia nagu nifaruka awõkhu, ba me no itandra, ba lõ edõna ibadu.
35 Ba me no laforõta ia, ba lafosasi nukhania, fadahõdahõ ira.
36 Ba dumadao ira, manaro ya’ia ba da’õ.
37 Ba labe’e yawa hõgõnia mbõrõ wa’amatenia, sura: ”Yesu da’e, razo niha Yehuda.”
38 Ba laforõfa awõnia zamara’u, darua, samõsa ba gambõlõ ba samõsa ba gabera.
39 Ba latandrawaisi ia sanõrõ, lafalikhõ ira,
40 ba lamane: He sanudugõ osali andrõ, ba sangotomosi ya’ia, si ha tõlu ngaluo, orifi ndra’ugõ, na Ono Lowalangi ndra’ugõ; ba ae tou moroi ba rõfa andrõ!
41 Si manõ gõi ndra ere sebua, la’o’aya ia, awõ zangila amakhoita awõ zatua mbanua andrõ, lamane:
42 Niha bõ’õ, ba no i’orifi, ba tebai i’orifi ia. Razo Ndraono Gizeraëli ia, yamõi tou iada’e moroi ba rõfa, ba mamati sa’ae ita khõuia.
43 No faduhu dõdõnia khõ Lowalangi, ba yamu’efa’õ ia da’õ iada’e, na i’omasi’õ ia: noa sa iwa’õ: Ono Lowalangi ndra’o.
44 Ba si manõ gõi zamara’u andrõ, niforõfa awõnia, wanandrawaisi ya’ia.
45 VI. Ba i’otarai laluo, ba tobali ogõmigõmi ba danõ ma’asagõrõ, irugi labõzi tõlu.
46 Ba so labõzi tõlu, ba mu’ao Yesu, ebua li, imane: Eli! Eli! lema sabakhtani? He Lowalangigu! He Lowalangigu! hana wa no õ’erogõ ndra’o? geluahania.
47 Ba lamane õsa, si so ba da’õ, me larongo da’õ: Mogaoni Eliya da’õ.
48 Ba i’anema’õ fagohi zamõsa khõra, ihalõ rabo, ifo’õsi niro aisõ, ibe’e ba mbalõ zukhu ba ifabadugõ khõnia.
49 Ba lamane tánõ bõ’õ: Bõi ua! datafaigi, na mõi Geliya, ba wangorifi ya’ia.
50 Ba ifuli mu’ao Yesu, ebua li, ba aetu noso.
Liturgos : Manunõ ita moroi ba Mbuku Zinunõ No. 98:4
Liturgos : Da tafondrondrongo daroma Li Lowalangi, tehalõ moroi ba zura HALÕWÕ ZINENGE 7:54-60
54 Ba me larongo da’õ, ba afõkhõ sibai ba dõdõra, ba lafatangi mbohara khõnia.
55 Ba no fahõna khõnia Geheha ni’amoni’õ, ba ifaõga hõrõnia ba zorugo, ba i’ila lakhõmi Lowalangi, awõ Yesu, si so ba gambõlõ Lowalangi;
56 ba imane: Hiza, teboka zorugo, u’ila ba so ba gambõlõ Lowalangi Nono Niha.
57 Ba mu’ao ira, ebua lira, laduhõ dõgi dalingara, lahurufai ia, ha sara dõdõ,
58 ba latuli’õ baero mbanua, ba latebu kara. Ba si so ba mbõrõ andrõ, ba labe’e samaigi nukhara nono matua, sotõi Saulo.
59 Ba latebu kara Zitefano; ba mangandrõ ia, imane: He Yesu, So’aya, tema nosogu!
60 Ba ibalõduhini tou danõ, mu’ao ia, ebua linia: He So’aya, be’e aefa khõra horõ andre! Ba aefa iwa’õ da’õ, ba aetu noso. Ba omasi Zaulo, me labunu ia.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura LUKA 23:44-48
- Famotokhi Taromali Lowalangi
- Sinanõ ba dõdõ tehalõ moroi ba zura LUKA 23:46a
- Fangandrõ Fondruhõ Wamotokhi Taromali
44 Ba mato laluo sa’ae, ba tobali ogõmigõmi ba danõ, ma’asagõrõ,
45 irugi labõzi tõlu, taya haga luo, ba asika mba’aba’a andrõ, ba gosali, fabali.
46 Ba mu’ao Yesu, ebua linia, imane: He Ama, ba dangau utou’õ nosogu. Ba me aefa iwa’õ da’õ, ba aetu nosonia.
47 Ba me i’ila da’õ fefu kumandra andrõ, ba isuno Lowalangi, imane: Si ndruhu, niha satulõ niha da’õ.
48 Ba dozi niha satõ, si no mõi mamaigi da’õ, me la’ila da’õ fefu, ba labõzi dotora ba lafuli ira.
Ba mu’ao Yesu, ebua linia, imane: He Ama, ba dangau utou’õ noso-Gu.
Jemaat : Manunõ moroi ba Mbuku Zinunõ No. 154
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
1. MANUNÕ
Pendeta : Manunö ita moroi ba Mbuku Zinunö No. 218 : 1-2 "YA’E DÕDÕ"
2. FOGAONI
Pendeta : "Ya’o Gö fangorifi," Iwa’ö Yesu, "Si möi khö-Gu, ba döhö wa’olofo, ba si faduhu tödö khö-Gu, ba lö sa’ae owökhi dödö." (Yohane 6:35).
3. FAMA'ANÕ
Muzizio zato
Pendeta : He ya’ami ira talifusö, da ta’owuawua’ö dödöda watomesa khö Lowalangi, ba wanema buala fa’ebua dödö-Nia, ba khö Zo’aya ya’ita Yesu Keriso, si no mate ba horöda, ba si no ifuli maoso wangalani fa’amate, irege falukha ita wangorifi ba fa’ohahau dödö. Andrö da tasekhegö dödö we’amöi föna Zo’aya.
Hadia edöna ami mi’ombakha’ö horömi khö Lowalangi, sangila era’era dödö niha? Hadia, lö mibini’ö, wa no misawö goroisa-Nia fefu? Hadia abu dödömi ba da’ö ba mi’ogorofi sa’ae wolau horö? Na si manö, ba mitema ligu: “tebai mabini’ö horöma”.
Jemaat : Tebai mabini’ö horöma.
Pendeta : Hadia faduhu göi dödömi lö sameta horö baero Yesu Keriso, si no manaögö huku salahimi ? Na faduhu dödömi, ba mitema ligu wanguma’ö: “Faduhu dödöma”
Jemaat : Faduhu dödöma.
Pendeta : Hadia, edöna ami mibeta ba dödömi wayaẅasa, awö watiusa, awö wa’afökhö dödö? Hadia edöna ami mi’efa’ö zala zi so sala khömi? Hadai edöna ami mi’ogorofi mbuabua niha si sagötö tanö andrö, ba wamöhöi ya’ia? Ba mitema ligu: “edönaga ya itologa Lowalangi.”
Jemaat : Edönaga ya itologa Lowalangi.
Pendeta : Mangandrö ita ba wangandrö fa’ahakhö dödö Lowalangi. "He Lowalangi ! Niha si so horö ndra’aga, ma’ombakha’ö horöma khö-U : oya nilauma si lö sökhi, salama khö-U ba tenga göi zide’ide. Oya göi ngawalö zi lö sökhi ba dödöma bakha: Fayaŵasa, fa’afökhö dödö, ba fatiusa; no ambö famati, ba no oya na danö bö’ö, si lö atulö nifaluama tanöföna-U. He Yehowa, hakhösi dödö-U ndra’aga ba wa’omasi-Mö andrö ! Efa’ö khöma horöma andrö ba wa’ebua dödö-U andrö ! Sasai ndra’aga ba horöma andrö börö nono-U Yesu Keriso si no mangöhöli ya’aga. Yaduhu!"
Tebe’e ginötö ba wangandrö ba dödö zamösana (1-2 menit)
Pendeta : Me no mi’ombakha’ö horömi ba wogamö fangefa, ba na sindruhundruhu mangesa dödömi ba horömi ba wanötöna fangorifi khö Yesu Keriso, ba tola ufaduhu’ö khömi: wa I’efa’ö horömi andrö fefu Lowalangi, börö wamakao andrö nitaögö Yesu So’aya ya’ita! Mudadao Zato!
4. MANUNÕ
Pendeta : Manunö ita moroi ba Mbuku Zinunö No: 182 : 1 "MÕIGA KHÕU, HE YESU"
5. OROISA YESU SANANDRÕSA BA WEMANGA GÕ NI'AMONI'Õ
Pendeta : Ya’ami banua niha keriso ni’omasi’ö. Mifondrondrongo daroma li Lowalangi, sanandrösa ba Wemanga Gö Ni’amoni’ö, “So’aya ya’ita Yesu me bongi andrö, me te’a mböli-Nia, me orudu manga Ia khö ndra nifahaö-Nia, ba Ihalö roti (mufazawa roti), I’aohasi gölö Lowalangi, ba Iboboto roti andrö, Ibe’e khö ndra nifahaö-Nia, ba Imane : “Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o”. Si manö göi Ihalö mako (mufazawa naha nagu), me no aefa manga ira, I’aohasi gölö Lowalangi, ibe’e khöra, ba Imane : “Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o”.
Ba li-Nia andre Ifaduhu’ö sibai khöda Yesu wanguma’ö. Ero na mi’a roti andre (mufazawa roti), ero na mibadu nösi mako andre (mufazawa mako), ba Uforoma’ö sibai khömi wa’omasi-Gu ami, awö wa’ahakhö dödö-Gu; niha si tekiko ena’ö ami, na lö Ubelegö mena’ö wa’auri-Gu fönami, fa böi sa’ae Itörö tödö Lowalangi horömi, ba wanguhuku ya’ami. Me no matedo, me no aduwa ndro-Gu iwa’ö Yesu ba aheta sa’ae horö na mifalu’i’ö khö-Gu.
Börö wa’amate ba femaoso Zo’aya ya’ita Yesu Keriso wa tasöndra wangefa horö awö wangorifi. Andrö dozi sanema ha sambua boto, ha sambua wamati, fa’omasi ba fanötöna, Ya faofao khömi Geheha Ni’amoni’ö.
Jemaat : Manunö Moroi ba Mbuku Zinunö No. 182 : 2 "MÕIGA KHÕU, HE YESU"
6. FAMA'EMA BA FANEMA'Õ GÕ NI'AMONI'Õ
Pendeta : Imane Yesu, "Mi’aine khö-Gu dozi serege tödö, Ufolombase ami."
Sato manunö moroi ba Mbuku Zinunö No. 237 "URONGO LIU YESU"
Pendeta :
1) Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o!
2) Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o!
Ena’ö Boto ba Do Zo’aya ya’ita Yesu Keriso, ni’amoni’ö ba solakhömi andrö, da’ö zangabölö’ö ba sondrorogö ya’ami irugi zi lö aetu. Mi’angawuli si fao fa’ohahau dödö. Ya mufahowu’ö ami Lowalangi, Yaduhu!
[Mudadao Zato ba teowuloi galasi ba ame'ela Wemanga Gõ Ni'amoni'õ / Mangawuli ba nahia zamösana, ba latörö wama’ema fasömbata ba nahia si no mufa’anö]
Pendeta : Manunö ita moroi ba Mbuku Zinunö No: 232 : 1 - 2 "NO SOMUSO TÕDÕ NDRA’O"
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat :
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba Mbuku Zinunõ No. 106:1
Jemaat : Ya'ahowu!!!