FANGOWAI BA FOGAONI
[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI Liturgos : Ma’owai ami fefu ba döi Zo’aya ya’ita Yesus Keriso, nitörö tödöda Fa’atumbu ba zi ma’ökhö andre. Ya'ahowu!
Jemaat : Ya'ahowu!
Liturgos : Yafao-fao khõmi Lowalangi!
Jemaat : Ya fao khõu Geheha-Nia!
FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ Noumero 59 : 1-2
FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Tumbu dania khõda nono, tebe’e khõda nono matua; tebe’e ba galisi-Nia wamatõrõ ba tebe’e tõi-Nia Zahõlihõli dõdõ ba Samolala tõdõ ba Lowalangi sabõlõ, ba Ama zi lõ aetu ba Salawa wa’atulõ. (Yesaya 9:6)
HALELUYA!!!
Liturgos : Mangandrõ ita, "He Lowalangi Ama khöma, si so ba zorugo! Masuno Ndra’ugö ba ma’andrö saohagölö-U, me no Öfatenge khöma Nono-U Yesu Keriso, si no tobali ösi niha, ba wangorifi ya’aga. Ma’andrö khö-U, be’e ohahau dödöma iada’a ba wanörö tödö fa’atumbu-Nia, ba be’e aboto ba dödöma, wa khöma sibai manandrösa halöẅö-Nia. Ondrasiga göi bongi, si mane me Öfatenge mala’ika sangondrasi ira kubalo luo no; foloi ba dödöma zogömigömi, ba angali’ö haga-Mö andrö, afu tola ma’omasi’ö era’erama zomasi dödö-U, he ba nirongoma, he ba ni’ila höröma, ena’ö tobali fondrou’ö wangaro’ö famatima khö-U, ba ba khö Nono-U, Yesu Keriso. He So’aya! Tolo dozi sangomasi’ö fa’ato’ele-Mö, awö dozi sihulu tödö ba wombalombaloi inõtõ we’aso-Mõ ba luo safuria, ena’ö falukha ira wondrara dödö. Ondrasi göi zofökhö si tebai mangondrasi omo-Mö, ba rara dödö zi numana, sangaröngarö, si göna abula dödö, si tosasa, awö zi so ba gurunga, mendrua manö nifakao gafökha. Tologa Eheha-Mö andrö, ena’ö oi te’orifi ndra’aga fefu ba gamozua. Yaduhu! Mudadao Zato
FANUNU LILI Liturgos : Iada’e tefalua wanunu lili, si no tandra wa’atohare haga ba gulidanö, ya’ia Yesu Keriso, sohagaini õsi gulidanö. Ma'andrö ena'ö möi föna nitötöima töi ba wanunu lili...
Pengkhotbah : I’otarai aekhu niha ba horö, no tobalu sogõmigõmi danõ ba si bongi zombalugõ soi niha. Ba hiza, börö wa’omasi Lowalangi, wa no möi ba khöda haga andrö, ya’ia Yesu Keriso. Imane Yesu, "Ya’odo haga nõsi guli danõ andrõ. Solo’õ Ya’o, ba lõ mowaõwaõ ba zogõmigõmi, so sa’ae khõnia haga ba wa’auri andrõ." Yaduhu!
Liturgos : Manunö ita moroi ba Mbuku Zinunö numero 53
Liturgos : Dumadao zato!
Liturgos : Manunõ ita moroi ba Mbuku Zinunõ Numero 61
FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II MOZE 15:1-3
1 Me luo da’õ lalau zinunõ andre Moze ba Iraono Gizeraëli, wanuno Yehowa, lamane wanunõ: ”Da’usuno Yehowa, me no salaw~a sebua ia; kudo ba si fakudo yaw~a, ba no ituli’õ ba nasi.
2 Fa’abõlõgu Yehowa ba fanunõgu, me no sangorifi ya’odo ia; Lowalangigu ia, andrõ usuno ia — Lowalangi namagu andrõ, u’ebua’õ duriania.
3 Sabõlõ ba wanuwõ Yehowa andrõ; Yehowa dõinia.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 20 : 1
FOMBASO WAÕWAÕ WA'ATUMBU YESU Liturgos : Da ta fondrondrongo wombaso waõwaõ wa'atumbu Yesu. Manunõ ita moroi ba Mbuku Zinunõ numero 54:1
(Möi föna zombaso waöwaö wa'atumbu Yesu)
Sombaso I [Luka 2 : 1-20]
Sombaso II [Luka 2 : 8-14]
Sombaso III [Luka 2 : 15-20]
Liturgos : Manunõ ita moroi ba Mbuku Zinunõ numero 54:2
FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Lowalangi sebuasi so ba zorugo yaẅa, aboto ba dödöma,wa no Öfatenge khöma Nono-U Yesu Keriso ba wangefa’ö horöma. Ma’andrö khö-U tologa, heta ba dödöma ngawalö zi lö sökhi, si no amaedola hili salaẅa, ba si no amaedola mbawa danö sabakha, ena’ö monahia ba dödöma Zangorifi andrö, ba wamahaö ya’aga wamalua somasi Ndra’ugö. Yaduhu!"
Jemaat : Manunõ moroi ba Mbuku Zinunõ No. 224 : 1
Liturgos : "Böi mi’ata’ufi, hi za sa, uturiaigö khömi wa’omuso dodo sabölöbölö, sirugi niha fefu dania, me no tumbu khömi Zangorifi andrö bongi andre, Keriso So’aya, ba mbanua Dawido." Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura MATAIO 1:18-23
18 Ba si mané wa’atumbu Yesu Keriso andrõ: Me no ifohu nina Yesu, Maria, Yosefo andrõ, me lõ sorudu ira na, ba terongo, manabina ia khõ Geheha ni’amoni’õ.
19 Ba ibõhõi manõ ia mena’õ Yosefo, soniha ya’ia, lõ i’ombakha’õ, me niha satulõ ia, lõ edõna i’ailasi.
20 Ba me ifatoutou tõdõnia da’õ, ba hiza, oroma khõnia mala’ika Zo’aya ba wangifi, imane: He Yosefo, ma’uwu Dawido, bõi ata’ufi wangai Maria andrõ, nihamõ; tabina andrõ, si so ba dalunia ba no moroi ba Geheha ni’amoni’õ.
21 Ba madono ia dania, ono matua, ba õbe’e tõi nono andrõ Yesu, me ya’ia zangefa’õ banuania ba horõra.
22 Ena’õ itõrõ niwa’õ Zo’aya, ni’ombakha’õ zama’ele’õ, andrõ si manõ da’õ fefu; imane sama’ele’õ andrõ:
23 ”Hiza, so dania nono alawe sanabina, ba madono ono maetua, ba labe’e tõi nono andrõ ”Emanu’eli’, ”awõda Lowalangi” geluahania, na la’ali [ba li niha].”
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana]
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
Fombaso Taroma Li Lowalangi moroi ba zura SINUNÕ 147:1-11
1 Haleluya! Misuno Yehowa, me si sõkhi wanunõ andrõ khõ Lowalangida, me omasiõ; si nangea wanunõ andrõ.
2 Ifuli itaru’õ Yeruzalema andrõ Yehowa; i’ozaragõ Ndraono Gizeraëli andrõ, nifazawili.
3 Ya’ia andrõ, sangebe’e’õ si no arasa tõdõ andrõ, sodaludaluni safõkhõ khõra.
4 Sangerai ha wa’oya ndrõfi andrõ, sanõtõi tõira fefu.
5 No ebua Zo’aya ya’ita andrõ, ba no fahõna wa’abõlõ khõnia: no si lõ fondrege wa’aboto ba dõdõnia andrõ.
6 I’abe’e’õ nifakao andrõ Yehowa ba ihõndrõgõ zebua horõ, irugi danõ tou.
7 Mi’anunõ khõ Yehowa, ya fao wangandrõ saoha gõlõ; misuno Lowalangida, wolau biola nitika andrõ side’ide!
8 Sangaloe banua lawuo, same’e teu ba danõ, samatumbu’õ du’u ba hili.
9 Same’e gõ ba gurifõ niha andrõ ba ba nono gaga andrõ, si’ao khõnia.
10 Tenga somasi ia wa’abõlõ kudo, ba lõ ba dõdõnia wa’esolo waha niha.
11 Somasi Yehowa, ba sangata’ufi ya’ia, sanõtõna fa’ebua dõdõnia andrõ.
Famotokhi Taromali Lowalangi
Sinanõ ba dõdõ tehalõ moroi ba zura II MOZE 15:2a
Fa’abõlõgu Yehowa ba fanunõgu, me no sangorifi ya’odo ia.
Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
Liturgos : Manunõ ita moroi ba Mbuku Zinunõ No: 68
FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
Ya mufahowu’õ ami Lowalangi, Ya murorogõ ami;
Ya mufohaga mbawa-Nia khõmi, Ya mu’ebua’õ dõdõ-Nia khõmi;
Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
